تحية لروح مبروك السلطاني
يظلم أبرياء وأنا بريء راسي
في جلمة وجثّتي في مغيلة !
وعلاش حكم الظلمة هكّة قاسي
وباسمك يا ربّي جزّروني الليلة؟
وباسمك يا ربّي جزّروني الليلة؟
وأنا صغير وبابا ماهو عاصي
ودافعت على المعزات قسم العيلة!
ودافعت على المعزات قسم العيلة!
وعلاش حكم الفقري ديمة مباصي
وللفقر ما لقيناش حتى حيلة؟
وللفقر ما لقيناش حتى حيلة؟
وظنيت عمري طويل مش قُلتيلي،
يا امّه، عمر الشقاء أيّامه راهي طويلة!
يا امّه، عمر الشقاء أيّامه راهي طويلة!
وأنا مع المعزات هكّة سارح
جوني الذيوبة باللحي طويلة،
جوني الذيوبة باللحي طويلة،
وبسيف إبليس قزّمولي راسي
تيجيك في ساشي ما تشوفيلَه؛
تيجيك في ساشي ما تشوفيلَه؛
وقلبي في جسمي قعَد فيه إحساسي
عند الزروق يا أمّيمتي بَرّيله!
عند الزروق يا أمّيمتي بَرّيله!
وضمّيني عند الصّبح تجيك أنفاسي
وليدك في حضنك ياما غنّيتيله،
وليدك في حضنك ياما غنّيتيله،
ونعرف غزير الدمع موش تيواسي
لكن بدمعك طالب التغسيلة.
لكن بدمعك طالب التغسيلة.
يا حاكم وعلاش حَياتي وفات الّليلة
وعلاش حكم الكافر لا الله في تنزيلَه؟
وعلاش حكم الكافر لا الله في تنزيلَه؟
شعر لزهر الضاوي (بتصرف)
